खबर संजाल, १० साउन, काठमाडौं ।
अदालतको परमादेश बाट प्रधानमन्त्री बनेका नेपाली कांग्रेसका सभापति शेर बहादुर देउवालाई मन्त्रिमण्डल विस्तार गर्नु फलामको चिउरा चपाएसरह बनेको छ । आफ्नै पार्टी भित्रको भागवण्डा मिलाउन समेत चर्को हुने अवस्थामा माओवादी, जसपा र माधव नेपाल सहितको गठबन्धनमा भागवण्डा मिलाउन झनै चर्को बनिरहेको छ ।
कोरोना भाइरसको यत्रो जोखिम बढिरहेको समयमा स्वास्थ्यसहित सबैजसो मन्त्रालय मन्त्री विहिन हुँदा सर्वसाधारण मारमा परिरहेका छन् । चौतर्फी बिरोध पछि कम्तिमा स्वास्थ्य मन्त्री नियुक्त गर्नुपर्ने मोडमा पुगेका देउवाले आजै स्वास्थ्य राज्यमन्त्री लाई नियुक्ति दिएका छन् । स्वास्थ्य मन्त्रालय जसपाको भागमा परे पनि जसपाले विवाद नटुंगदा सम्म मन्त्रीको नाम दिन नसक्दा देउवाले राज्यमन्त्री नियुक्त गर्नुपरेको हो ।
देउवा सरकारमा कांग्रेस सांसद एवम् निजी विद्यालय व्यवसायी उमेश श्रेष्ठ स्वास्थ्य तथा जनसंख्या राज्यमन्त्रीमा नियुक्त भएका छन् ।
नवनियुक्त राज्यमन्त्री श्रेष्ठ हात्तिवनस्थित लिटिल एन्जल्स एजुकेसन ग्रुपका सञ्चालक हुन् । उनी उच्च माध्यमिक विद्यालय संघ नेपाल(हिसान)का संस्थापक अध्यक्ष र निजी तथा आवसीय विद्यालय अर्गनाइजेसन नेपाल (प्याब्सन)का पूर्व अध्यक्ष हुन् । उनी जनमैत्री अस्पतालका लगानीकर्ता समेत हुन् ।